Hestaborg.com

IS2009286201 - Móálótt

F: Ófeigur frá Bakkakoti
FF: Ófeigur 882 frá Flugumýri
FM: Blika frá Bakkakoti
MF: Reykur frá Hoftúni
MFF: Ófeigur 882 frá Flugumýri

Það er alltaf gaman þegar tryppin breytast í reiðhross og þar sem ræktunin okkar er mjög ung, er spenningurinn ennþá meiri þegar maður fer að sjá þau þeytast fyrir utan gluggann hjá manni.  Rauða hryssan á myndinni er Hlédís frá Borg, þriggja vetra og verður fjögurra vetra í vor.  Hlédís er undan Hylli frá Hvítárholti sem er gæðingur Súsönnu Ólafsdóttur.  Hlédís hefur nú aldrei látið mikið yfir sér með tryppi en hún er í dag orðin vel reiðfær, búið að ríða henni c.a. 10 skipti úti á veg, hún er ekki ennþá farin að sýna okkur tölt en þó teljum við líklegt að hún sé alhliða hryssa þó að hún þurfi gangsetningu.  Hún er viljug og lifandi, feiknalega rúm á brokki með mikla spyrnu og góðan fótaburð.  Verður eflaust orku- og rýmishross.

Þjálfun gengur vel á Borginni.  Við eigum töluvert af efnilegum hryssum í húsinu, ýmist allar eða til helminga.  Ein af sameignum er hún Blika frá Bakkakoti, Bliku eigum við með Báru Rúnarsdóttur á Kornvöllum en Blika er undan Víglundi frá Vestra-Fíflholti.  Blika er stór og mikil og hefur þurft sinn tíma.  En tíminn hefur unnið henni í haginn og Blika hefur margt til brunns að bera til að verða alvöru gæðingur.  Allavega þarf ekki að kvarta yfir rými eða fótaburði!

Það var svo skrýtið að Guðmundur Óli tók uppá því haust að ákveða uppá eigin spýtur að þetta væri hesturinn hans.  Það var nú samt meðvituð ákvörðun að leifa honum að kjassast utaní Blæng þar sem hann er svo stilltur og prúður en fljótlega var þetta orðinn fastur liður í að fara í hesthúsið.. Hvar er hesturinn minn???  Síðan dröslaðist hann með hey fram og til baka og skeyttu engu um það hversu afbrýðisamir aðrir hestar urðu.. "ég ætla að gefa hestinum mínum hey"..  Það gekk meira að segja svo langt að Blængur var útí á túni í veðurblíðunni en það breytti engu.. út með heytuggu dröslaðist litli maðurinn til að gefa hestinum sínum hey.  Síðan horfir hann á hann borða heyið og kyssir hann bless þegar hann fer.  Þetta.. og það að Blængur er hjá okkur af sérstakri ástæðu, var tekin sú ákvörðun að Blængur yrði aldrei seldur og þetta væri hesturinn hans.  Blængur skipar líka mjög veigamikið hlutverk í hesthúsinu, hann er tamningahesturinn.. utaná hann eru bundin baldin tryppi og oft þarf hann að dröslast tvisvar á dag til að leiða lítið tamin tryppi útí veröldina.  Og stóra stundin rann loksins upp að hann fékk að fara á hestbak.. hamingjan var ótrúleg.. skellihló hring eftir hring og var hamingjusamasti drengur í heimi.  Blængur er öðlingur og er.... hvað sem aðrir segja... LANGBESTI hesturinn í húsinu.

Emil er nýjasti ábúandinn á Borg.  Hann er c.a. 6 vikna kettlingur, loðinn og ferlega mikið krútt.  Við vorum búin að ákveða að vera með eina kisu inní íbúðarhúsi en úti í hesthúsi er Borgarnótt og tvær dætur hennar.  Guðmundur Óli er virkilega ánægður með Emil og er kominn með nýjan leikfélaga, allavega meðan Emil er lítill og alltaf tilbúinn að sprella.. spurning hvað verður síðar!

Aldrei þessu vant eigum við um helming hrossanna sem eru í hesthúsinu í dag, ýmist í heilu lagi eða hálfu!  Við höfum komið okkur upp töluverðum fjölda af hrossum og við reynum eftir fremsta megna að koma þeim að í tamningu og þjálfun, en því miður hafa þau mikið til verið útundan að undanförnu...  Ein af þeim hryssum sem eru núna í hesthúsinu er Ótta frá Hamrahóli, en hana valdi ég sem folald í Hamrahóli og hún hefur aldeilis stækkað og dafnað síðan þá.  Orðin gullfalleg og geðslagið frábært, ljúf sem lamb og gangurinn opinn og efnilegur.  Við höfðum nefnilega áhuggjur af henni Óttu sem folald þar sem hún var í meira lagi stygg og erfið, við höfðum hana inni hjá okkur í c.a. tvær vikur þar sem við strukum henni og kjössuðum á hverjum degi, fyrst reyndar með hanska á priki þar sem hún ætlaði óð að verða ef maður fór inní stíuna til hennar.  Síðan fór hún í uppeldi til Tóta í Þorlákshöfn og þar fær hún næga hlýju og gott atlæti.  En þetta hefur greinilega borgað sig þar sem hún er núna ljúf og stillt, treystir manninum vel og vill þóknast honum eftir fremsta megni.